എസ്എസ്എബി തിരിച്ചടികളെ അതിജീവിച്ച് സൈനിക ഓഫീസറായി ഹർഷ് ദീപ് സിംഗ്

മൂന്ന് സേനകളിലും സാന്നിധ്യമറിയിച്ച് സിംഗ് കുടുംബം

പട്ന: പരാജയങ്ങളും തിരിച്ചടികളും സ്വപ്നത്തിലേക്കുള്ള യാത്രയ്ക്ക് തടസ്സമാകില്ലെന്ന് തെളിയിച്ച് 27-കാരനായ ഹർഷ് ദീപ് സിംഗ് ഇന്ത്യൻ ആർമിയിൽ ലെഫ്റ്റനന്റായി കമ്മീഷൻ നേടി. ബിഹാറിലെ പട്ന സ്വദേശിയായ ഹർഷ് ദീപ് നിരവധി തവണ എസ്‌എസ്‌ബി (Services Selection Board) പരീക്ഷയിൽ നേരിട്ട തിരിച്ചടികൾക്ക് പിന്നാലെ ഒടുവിൽ വിജയം കൈവരിക്കുകയും ഗയയിലെ ഓഫീസേഴ്സ് ട്രെയിനിംഗ് അക്കാദമിയിൽ (OTA) പരിശീലനം പൂർത്തിയാക്കി പാസ്ഔട്ട് ചെയ്യുകയും ചെയ്തു.

സൈനിക സേവനം ഹർഷ് ദീപിന് പുതിയ അധ്യായമല്ല; കുടുംബത്തിന്റെ അഭിമാന പാരമ്പര്യത്തിന്റെ തുടർച്ച കൂടിയാണ്. പിതാവ് ഇന്ത്യൻ എയർഫോഴ്സിൽ സേവനമനുഷ്ഠിക്കുമ്പോൾ, ജ്യേഷ്ഠ സഹോദരൻ ഇന്ത്യൻ നേവിയിൽ ലെഫ്റ്റനന്റ് ആയി സേവനമനുഷ്ഠിക്കുന്നു. ഹർഷ് ദീപ് ഇന്ത്യൻ ആർമിയിൽ ലെഫ്റ്റനന്റായി ചുമതലയേറ്റതോടെ സിംഗ് കുടുംബത്തിന് ഇന്ത്യൻ സായുധസേനയുടെ മൂന്ന് വിഭാഗങ്ങളിലും സാന്നിധ്യമെന്ന അപൂർവ നേട്ടം സ്വന്തമായി.

സൈനിക ജീവിതത്തിലേക്ക് പ്രവേശിക്കുന്നതിന് മുമ്പ് ഹർഷ് ദീപ് പ്രമുഖ ഐടി കമ്പനിയായ ഹെക്സാവെയർ ടെക്നോളജീസിൽ സോഫ്റ്റ്‌വെയർ ഡെവലപ്പറായി ജോലി ചെയ്തിരുന്നു. സോഫ്റ്റ്‌വെയർ മേഖലയിലെ കരിയർ ഉപേക്ഷിച്ച് സൈനിക സേവനം എന്ന സ്വപ്നം പിന്തുടർന്നാണ് അദ്ദേഹം ഒടുവിൽ ലക്ഷ്യം കൈവരിച്ചത്.